وزارة الداخليه vs وزارة التربيه ... الى متى التناقض يا حكومه ؟

السلام عليكم و رحمة الله و بركاته
لو متابعين الأخبار بتعرفون ان الكويت في صدد تسفير مئات الآلاف من العماله الهامشيه
الوافدين الي لا يهشون و لا ينشون و هذا توجه سليم من وزارة الداخليه الي عليها قبل تسفير
هالبشر ان تحاسب و تعاقب تجار الاقامات الي وهقوا هالفقاره !
مو هذا موضوعنا
وزارة التربيه تسمح لازواج المعلمات الوافدات بالقدوم الى الكويت !!
http://alwatan.com.kw/Default.aspx?MgDid=665964&pageId=26
طيب اهي معلمه فاضله و زوجها ببلدها بلطجي شماله يدخل الديره ؟
في اكتفاء بالجنسيات طالبين عشرات الآلاف من المدرسات و اكيد كل وحده بتييب زوجها و عيالها
http://alwatan.com.kw/Default.aspx?MgDid=665965&pageId=26
جم يصير العدد ؟
الابلات اوكي فيهم خير و بركه يشتغلون و يقبضون
بس ازواجهم ؟؟؟ شنو الحكمه ؟؟؟
بتنفجر حولي و خيطان و الجليب من هالعالم الي فيها
مو كافي زحمه ؟
مو كافي جرايم ؟
مو كافي ضغط على الخدمات؟
مو كافي مو كافي مو كافي ؟
اصلا هالمقيم ياخذ مكان الكويتي و صار ياخذ وظيفته و لقمته بعد
وين هيبة القرارات الوزاريه اذا اهي تخالف بعضها ؟
الايام اليايه بتبين لنا اي وزاره راح تمشي كلامها على الثانيه
و سلم لي على الكويت !!

الناس ضجت و على دوام رمضان احتجت !!

السلام عليكم

سموا باسم الله ما ابي اخرعكم

هذي صورة وزيرتنا ام عادل الله يعطيها العافيه ما ادري منو مضيق خلقها قبل لا تصور :\

اتذكر من كنت بالثانويه و هالدعاوي و التحسب تنصب على راس هالمسيجينه صب سواء من ابلات ... طالبات ... اولياء امور ... و جنه اشتاقت لهالدعاوي فلعبت لعبه صغيره خلت الصغير قبل الكبير يحتج و يتحلطم بما لا يليق بأم عادل ... وزادت عليها الدعاوي و المسبات !

عيشتنا بحلم لطيييييف و ان رمضان عطله على الاقل العشر الأواخر يه يه يه منو ما يصدق الوزيره بكبرها ؟

ترست الجرايد بصورها و تصريحاتها القويه و تتكلم بثقه تامه خلت الكل يطييير فرح

اخيرا الطالب يقدر يدرس و هو شبعان اكل و نوم و اخيرا قدروا الكبار انهم يقومون الليل بدون لا يحاتون القومه من النوم و الدوخه و زحمة الشوارع و حرارة الجو الي تخلي من ريجك حطبه !!

و فجأه يتبخر هالحلم و تقوم على الواقع ماكو عطله و العطله تأثر بالسلب على اقتصادنا و احنا تعاقدنا و احنا حجزنا و المدرسين بالدرب و المناقصات و مادري شنو بعد من هالحجي الفاضي

المهم ..

ماكنت الناس راح تضج او تحتج لو ما عشمتهم لكن الحين صار الي صار و لي وجهة نظر ... ( شكلي بنطق بالقزمه الأديمه هههههه )

من عمر نداوم برمضان و ماصار فينا شي و الي يشتغل يشتغل سواء صايم او فاطر هو و ضميره و فوق هذا يواصل مرات عادي و قايم الليل بالمسيد الكبير ( آآآآه له وحشه هالمسيد ما ينشبع منه )

و كنا طلبه و درسنا و امتحنا و نجحنا و بنفس الوقت كنا نختم القرآن و نقز ندور هدوم العيد بعد و يبقى السقيط سقيط و الناجح ناجح

و كنا نوصل اليهال و نروح الدوام و نرجع و نريح و نسوي مائده شكبرها فيها مالذ و طاب و هم يمدي تفرفر قنوات التلفزيون و تتفطر بالراحه و ترجع تريح و بعدها تطلع و تصلي التراويح بعد ما تزور و تغبق و تقدر على الجيام

و ما صار فينا و لا عمرنا اشتكينا !!

اصلا يا بختنا نشتغل و نتعبد بالشهر الفضيل !

ندوبل هالاجر و الثواب و كل واحد فينا عارف اهو شنو و شكثر يحتاج هالاجر و رضا ربه .. المعاصي و البلاوي كثرت والله ان الواحد يحتاج الحسنه الوحده و يدور عليها و انتوا ترفضونها

صبروا ياناس و تصبروا ترا اجدادنا دخلوا البحر و بعضهم صام بعرض الماي و الحمدالله ما صار فيه الا العافيه !! مو حملات و مظاهرات و مادري شنو

شهالتعنفق صج عيال بيتزا و همبورغر :q

الله يبلغكم رمضان و تصومونه ان شالله :)

و تعيشون و تاكلون من هالوزيره و ان شالله تكبرون و تنسون

و اخيرا لام عادل .. ولا أٌقول بدون تعليق احسن

الاسم , هو الهويه , ليش كويتيات ؟

السلام عليكم و رحمة الله و بركاته

لأول مره بحياتي أجرب كتابة المدونات مع اني ادري انها صارت موضه قديمه

و بما ان الكل صار عنده ليش مو انا !

خاصه وان لي رأيي , فكر , اقتراحات .... و لي صوت و أبي أوصله ... ابي الناس تسمعه

يمكن تطرقت لمواضيع ما يات على بالكم ... سوالف ... فضفضه ...و يمكن لأ

بالمختصر ابي امارس هواية الحريم

الهذره حتى و لو كانت مع نفسي !

فان وجدت من يقرأ لي فهذه نعمه و ان لم أجد فهذه نعمه أخرى :)

بيني و بينكم داشه المدونات و ايدي على قلبي

اخاف اتكلم و اروح ورا الشمس مثل غيري !

عموما ما يطيح الراس الا الي ركبها و الله يستر :)

كويتيات

اقصد فيها ملاحظات كويتيه

امور كويتيه

حالات و ظواهر كويتيه

تحلطمات كويتيه ( جنها غلط هههههه )

اوضاع كويتيه

فجمعتها باسم كويتيات

اتمنى ان تكون بدايه موفقه و مقبوله

دمتم بِود

بالعربي يعني ( خدا هافز هههه )